Briathra

Cad atá cruinn: “Ní bhfaighfidh mé” nó “Ní gheobhaidh mé”? Tá briathra na Gaeilge cuíosach simplí, ach má tá gá agat le réimniú bhriathair a aimsiú go díreach, bíodh a fhios agat go bhfuil roinnt áiseanna ann chun cabhrú leat.

Freisin, má tá amhras ort maidir leis an gcaoi a úsáideann tú na briathra chéanna, bíodh a fhios agat freisin go bhfuil leathanach eile ann a phléann an cheist seo.

Ar an Idirlíon

Is féidir dul go dtí An Foclóir Beag atá ag Ollscoil Luimnigh:

agus an leagan den bhriathar sa Mhodh Ordaitheach a chur isteach sa bhosca cuardaigh. Mar shampla, má chuireann tú “scríobh” isteach sa bhosca, agus an cnaipe a bhrú, taispeánfar gach leagan den bhriathar.

Má tá an leagan diúltach ag teastáil, nó an leagan ceisteach, ní gá ach an cnaipe cuí a bhrú agus taispeánfar é.

Cé nach bhfuil an suíomh féin róálainn, tá an t-eolas ann cruinn, agus é bunaithe ar An Foclóir Beag, a d’fhoilsigh An Gúm roinnt blianta ó shin.

Le WinGléacht

Is féidir leas a bhaint as an bhfeidhmchlár WinGléacht chomh maith. Cuir isteach an briathar arís sa Mhodh Ordaitheach, agus déan deaschliceáil chun gach leagan den bhriathar a fheiceáil.

Tá an leagan amach beagáinín níos deise ná sa suíomh ag an ollscoil, ach níl an t-eolas ar fad ar an aon leathanach.

Is gá íoc as an bhfeidhmchlár WinGléacht. Ní áis saor ó chostas é. Tá tuilleadh eolais faoi faoin gcolún Aistriú/WinGléacht ar an suíomh seo.

Mí-Usáid Aimsire na mBriathra Gaeilge

Is minic a bhaintear mí-úsáid as briathra i nGaeilge, agus de ghnáth is é atá laistiar de seo ná éifeacht an Bhéarla. Déanann an suíomh seo a leanas, ó acmhainn.ie cur síos ar roinnt de na drochnósanna, agus molann sé leigheas orthu:

Mí-Úsaid na mBriathra Gaeilge - Acmhainn.ie

LibreOffice - An Próiseálaí Focal is Fearr

Molaimid d’aon duine atá ag scríobh as Gaeilge leas a bhaint as LibreOffice. Seo próiseálaí focal atá saor in aisce ina bhfuil litreoir leictreonach agus teasáras freisin. Is féidir PDF a dhéanamh as an téacs freisin ar bhealach iontach éasca.

Is féidir cáipéisí MS Word a léamh le LibreOffice, athruithe a dhéanamh, agus iad a shábháil arís mar cháipéisí MS Word.

Foclóir Gaeilge/Gaeilge ar-líne

Tá foclóir Gaeilge/Gaeilge ar fáil ar-líne. Ní hamháin go bhfuil míniú ar fhocail i nGaeilge, ach tá gach leagan de bhriathra agus focail eile a athraíonn le fáil ann freisin.

Potafocal

Má tá eolas uait ar fhocal ar bith, ní gá duit ach cuairt a thabhairt ar an suíomh potafocal.com. Déanann an suíomh seo eolas atá ábhartha maidir leis an bhfocal atá á chuardach a chur ar fáil. Baintear leas as neart foinsí éagsúla, agus bíonn nascanna ann freisin ag áiseanna eile, leithéidí focal.ie. Is fiú go mór leas a bhaint as.